معلشى... ماتقفشى

الفكرة إن أنت بيجى فى سكتك حاجات و الحاجات ديه مش هى إللى أنت عايزها. يعنى مثلاً، بيجيلك شغل مش هو الشغل المثالى بس أنت بتعيش و تتعايش لحد ما يجيلك شغل تانى. انت مثلاً بتفقد حد أنت بتحبه جداً إما عن طريق الموت أو عن طريق الحتمية التايخية أو عن طريق الفتور المتبادل بينكم. أنت كمان ممكن تخسر مبدأ او فكرة أو أحد والديك أو أى حد قريب ليك من غير ما تكون عامل حسابك. الأحسن متعملش حسابك على حاجة. الأحسن تفتكر إن كل الحاجات ديه حصلت لناس قبلك و عاشوا و كملوا و بقوا ناس عظيمة و بقوا ناس سعيدة تانى. الأحسن إنك تفهم إن الدنيا مش هاتستناك و لا هاتستناهم و لا يهمها وجودك أصلاً من عدمه. الأحسن إنك تحوَش و تسافر كل شوية (السفر ممتع). الأحسن إنك تغرق كل ده فى الضحك مع صحابك عليه و استغراقهم فى التنكيت على المواضيع ديه بالذات. الأحسن إنك تفتكر إنك قادر و زكى و مراوغ و حتماً هتعرف تتضحك على القدر لفترة معينة بس لازم تكون عارف إنه هيكسب الروند الجاى. الأحسن إنك تعيش بدل ما تستنى. الأحسن إنك تفتكر لحد ما تبطل تفتكر. الأحسن إنك تتنفس بدل ما تفكر قد أيه الاستسلام للاختناق مريح. الأحسن أنك تحب.
ده طبعاً كله الأحسن.... بس مش الأسهل
و الله الموفق