حرية مصر مستعد يموتلها أكثر الناس بعداً عن الدين و أكثر الناس إيماناً بالدين (بصورته الصحية). الشهادة من أجل الوطن من أنبل ما يمكن للأنسان تحقيقه
أنا مستعدة أموت علشان الحرية فى مصر
علشان أنا متأكدة إن استشهادى هيكون ليه صدى على الأقل على شخص واحد ممكن يحمسه على إتمام مسيرة المصريين نحو ما هو أفضل
لو مت فى مظاهرة ممكن تعملوا جمعية لتنمية الصعيد و تسموها "اختر أجندتك" زى اسم مبادرتنا إللى عملناها أنا و أصحابى، التنمية فى هذه الحالة مش بناء مستشفيات و مدارس، لأ، لازم يكون نشاط تنموى يعمل به مسيحيين و مسلمين يهدف لترسيخ فكرة إن المسيحيين و المسلمين بيشتغلوا مع بعض آهه من غير شعارات رنانة لازم يكون ليهم شغل على الأرض مع بعض بصورة غير مفتعلة و طبعاً ده هيكون لشباب الجامعات و إنت نازل، الأكبر من كدة لا سبيل لإصلاحهم
وصيتى تبقوا شوكة فى حلق العسكر و الأسلاميين
وصيتى تولعولى شمع فى الكنيسة المعلقة فى مصر و القلب المقدس فى باريس (إن أمكن) و تصلوا عليا فى جامع عمرو بن العاص
لما أموت اتبرعوا بأعضائى
لو مت فى مظاهرة عايزة تابوت مفتوح فى الجنازة، عايزة أشوف الشوارع إللى ماشية فيها فى طريقى إلى المجهول
عايزة عزاء مختلط (ستات على رجالة) فى بيتى مش عايزة أوقف الشارع علشان الناس ترمى عربيتها و تروحى تعزى فيا فى جامع أو كنيسة كبار
أصحابى و أهلى ياخدوا إللى عايزينه من حاجتى، كل واحد لازم ياخد حاجة
مش هتفرق اوى معايا أدفن إزاى
وعد، لو عرفت أرجع أقوللكم فى إيه هناك، هرجع أقول
يعنى.... هحاول
أنا بحب الحياة جداً
No comments:
Post a Comment