غياب الشىء يثبت وجوده*

أنا بعلَى المزيكا و أنا سايقة لوحدى علشان ماسمعش دماغى

بعلَى المزيكا علشان ماسمعش كلاكسات و لا أهتم لحد كسر إشارة أو حد كسر عليا

بعلَى المزيكا علشان فى أغانى كتير أوى محوطانى بتفكرنى بيك و لازم أخلَى نفسى أنسى إنها بتفكرنى بيك

بعلَى المزيكا علشان أنا مش قادرة أقعد مع نفسى، مع صمتى أكتر من كدة

بعلَى المزيكا علشان أنت عارف كل الأغانى بتاعتى، و أنا عارفة أنت هتمشى أنهى أغنية و هتعلََى أنهى واحدة و هتسيب أنهى واحدة علشان أنا بحبها و هتغنى مع أنهى و هتدى فرصة لأنهى علشان تحبها زى ما أنا بحبها

أنا بعلَى المزيكا علشان خايفة ألمحك صدفة فى الشارع.... و أنا نازلة من الشغل فى جاردن سيتى، و أنا بلف فى مصر الجديدة ورا المشاوير و محلات الشاورما، و أنا فى وسط البلد بين الاجتماعات و المقابلات و المظاهرات و المصالح و القهاوى و ريحة الشيش

بخاف أشوفك جنبى أول مافتح عينى فى سريرى الصبح أو أول مابدأ فى النوم بليل

أنا بعلَى المزيكا علشان عدم وجودك صوته أعلى من معظم الحاجات التانية و أنا بحاول أغطيه

و أنا هنجح

و لوحدى

*العنوان من بوست كارد أشتريته من كام اسبوع فاتوا